1Sa 26 | NdeIBE | STEP | AmaZifi aya kuSawuli eGibheya athi kuye, “UDavida kacatshanga entabeni yaseHakhila, ekhangele eJeshimoni na?”

1 Samuel 26

UDavida uphephisa impilo kaSawuli, futhi

1 AmaZifi aya kuSawuli eGibheya athi kuye, “UDavida kacatshanga entabeni yaseHakhila, ekhangele eJeshimoni na?”

2 Ngakho uSawuli waya eNkangala yaseZifi, elezinkulungwane ezintathu zabantu bakhe abakhethiweyo bako-Israyeli, ukuyadinga uDavida khona.

3 USawuli wenza isihonqo phansi komgwaqo entabeni yaseHakhila ekhangele eJeshimoni, kodwa uDavida wahlala enkangala. Kwathi ebona ukuthi uSawuli wayesemlandele khonale,

4 wathuma izinhloli wasekwazi ukuthi uSawuli wayefikile impela.

5 Ngakho uDavida wasuka waya lapho uSawuli ayemise khona wabona lapho okwakulele khona uSawuli lo-Abhineri indodana kaNeri, umlawuli webutho. USawuli wayelele phakathi kwesihonqo, ibutho lisezihonqweni limhanqile.

6 UDavida wasebuza u-Ahimeleki umHithi lo-Abhishayi indodana kaZeruyiya, umfowabo kaJowashi, wathi, “Ngubani ozahamba lami phakathi kwesihonqo kuSawuli na?” UAbhishayi wathi, “Ngizahamba lawe.”

7 Ngakho uDavida lo-Abhishayi baya ebuthweni ebusuku babona uSawuli elele ubuthongo phakathi kwesihonqo umkhonto wakhe ugwaze phansi eduzane lekhanda lakhe. U-Abhineri lamabutho babelele bemhanqile.

8 U-Abhishayi wasesithi kuDavida, “Lamhla uNkulunkulu unikele isitha sakho ezandleni zakho. Khathesi-ke kahle ngimgwazele phansi kanye nje ngomkhonto wami; kangiyi kugalela kabili.”

9 Kodwa uDavida wathi ku-Abhishayi, “Ungambulali. Ngubani ongabeka isandla kogcotshiweyo kaJehova angabi lecala na?”

10 Wasesithi, “Ngeqiniso elinjengoba uJehova ekhona, uJehova yena ngokwakhe uzamtshaya; mhlawumbe isikhathi sakhe sizafika afe, loba aye empini abhubhe. 11 Kodwa uJehova kanqabele ukuba ngibeke isandla kogcotshiweyo kaJehova. Thatha umkhonto lesigxingi samanzi okuphansi kwekhanda lakhe, sihambe.”

12 Ngakho uDavida wathatha umkhonto lesigxingi samanzi okwakuphansi kwekhanda likaSawuli, basebehamba. Bonke babelele ngoba uJehova wayebehlisele ubuthongo obukhulu.

13 UDavida wachaphela ngakwelinye icele wema phezu kwentaba khatshana; kwakulebanga elibanzi phakathi kwabo.

14 Wamemeza ibutho lo-Abhineri indodana kaNeri, wathi, “Kanti kawungiphenduli, Abhineri na?” U-Abhineri waphendula wathi, “Ungubani wena omemeza inkosi na?”

15 UDavida wathi, “Uyindoda, kawusiyo na? Njalo ngubani onjengawe ko-Israyeli na? Kungani ungayilindanga inkosi yakho na? Umuntu othile ufikile ukuba abulale inkosi yakho. 16 Okwenzileyo kakukuhle. Ngeqiniso elinjengoba inkosi ikhona, wena labantu bakho lifanele ukufa, ngoba kaliyilindanga inkosi yenu, ogcotshiweyo kaJehova. Khangelani emaceleni enu. Ungaphi umkhonto wenkosi lesigxingi samanzi okube kuphansi kwekhanda layo na?”

17 USawuli walazi ilizwi likaDavida, wasesithi, “Yilizwi lakho lelo yini, Davida ndodana yami?” UDavida waphendula wathi, “Yebo yilo, nkosi, nkosi yami.” 18 Wengeza wathi, “Kanti kungani inkosi yami ixotshana lenceku yayo na? Kuyini engikwenzileyo, njalo licala bani engilalo na? 19 Khathesi-ke nkosi, nkosi yami, lalela amazwi enceku yakho. Uma uJehova ekuqubule ukuba umelane lami, kamkele umhlatshelo. Kodwa uma kwenziwe ngabantu, kabathukeke phambi kukaJehova! Khathesi sebengixotshile esabelweni sami elifeni likaJehova njalo bathi, ‘Hamba uyekhonza abanye onkulunkulu. 20 Ungenzi igazi lami lichithekele phansi khatshana lobukhona bukaJehova. Inkosi yako-Israyeli iphumile ukuzadinga indwebundwebu – njengomuntu ozingela isikhwehle ezintabeni.”

21 Lapho-ke uSawuli wathi, “Ngenze isono. Buya Davida, ndodana yami. Ngenxa yokuthi ukhangele impilo yami njengegugu lamhla, kangiyikuzama futhi ukwenza okubi kuwe. Ngempela ngenze ubuwula njalo ngiphambanise kakhulu.”

22 UDavida waphendula wathi, “Nanku umkhonto wenkosi. Wothi omunye wezinsizwa zakho keze ngapha azewuthatha. 23 UJehova uvuza umuntu wonke ngenxa yokulunga kwakhe lokuthembeka kwakhe. UJehova ukunikele ezandleni zami lamhla, kodwa kade ngingeke ngibeke isandla kogcotshiweyo kaJehova. 24 Ngeqiniso njengoba ngiqakathekise ukuphila kwakho lamhla, sengathi kanjalo-ke inkosi ingaqakathekisa ukuphila kwami ingisindise kukho konke ukuhlupheka.”

25 Lapho-ke uSawuli wathi kuDavida, “Sengathi ungabusiseka, ndodana yami Davida; uzakwenza izinto ezinkulu njalo unqobe.” UDavida wasuka wazihambela, uSawuli wasebuyela ekhaya.